gestig
3 Junie 1910
saamgesmelt met
NG Gemeente Volksrust-Suid
ring
Ring van Wakkerstroom
adres
Joubertstraat 26, Volksrust
eerste predikant
Ds JI de Wet
Die NG gemeente Volksrust is ‘n gemeente in die Oostelike Sinode.
In 2016 het die gemeente bestaan uit 426 belydende en 100 dooplidmate terwyl die proses van samesmelting met Volksrust-Suid na verwagting in daardie jaar afgehandel sou word. In die NGK Jaarboek van 2021 was die getalle van die verenigde gemeente 89 en 415. Die predikant was toe ds. Charl van Schalkwyk.
Die gemeente was eers deel van die moedergemeente Wakkerstroom, toe dit bearbei is deur ds. D.P. Ackerman. Reeds voor afstigting is dit egter heeltemal afsonderlik deur ’n hulpprediker, ds. J.I. de Wet, bearbei. Hy het op 2 Desember 1905 met sy werk begin. Op dieselfde dag is die kerkgebou ingewy deur ds. P.J. Wolhuter, destyds leraar van die gemeente Piet Retief.
Op 4 Junie 1910 het die Ringskommissie van Utrecht, in die dae toe die gemeentes in die gebied van die ou Nieuwe Republiek nog tot die Transvaalse Kerk behoort het, die gemeente Volksrust afgestig. Die eerste kerkraad het bestaan uit ses ouderlinge en nege diakens. Binne ses jaar is reeds die geliefde vader P.J. van Rensburg en twee diakens deur die dood weggeneem. Nie lank ná die stigting nie, is ds. J.I. de Wet tot eerste predikant van die nuwe gemeente beroep en word hy op 3 Desember 1910 as eerste leraar en herder bevestig.
Die dorp Volksrust lê aan die grens van Mpumalanga en KwaZulu-Natal, nie ver van die voet van die geskiedkundig belangrike Majubaberg nie en dus in die Drakensberge op ’n hoogte van sowat 1 650 meter bo seespieël. Met sy stigting was die gemeente waarskynlik die enigste in Suid-Afrika wat lidmate in drie verskillende provinsies gehad het, naamlik Transvaal, Natal en die Oranje-Vrystaat.
Die kerkgebou was reeds kort ná die gemeente se stigting heeltemal te klein, “en de gemeente hoopt door Gods genade binnekort of het kerkgebouw te vergroten, of een nieuw en doelmatig gebouw daartestellen”. Ds. De Wet kon egter eers in 1927 die huidige kerkgebou se hoeksteen lê. Dit is ontwerp deur die vermaarde argitek Gerard Moerdyk.
Predikante
- Jacobus Ignatius de Wet, 1910 – 1938
- J M Benade, 1939 – 1943
- Johannes Christoffel Cronjé, 1943 – 1944
- Willem de Wet Strauss, 1944 – 1946
- Jacobus Gideon Conraad Burger 1946 – 1947 (Tydelike hulp)
- Andre Tiran Ferreira, 1953 – 1957
- Johannes Petrus Hercules Gertenbach, 1947 – 1971
- Jan Hendrik de Swardt Roos, 1976 – 1993
- Eduard Christiaan le Roux, 1994 – 2006
- Ettienne Pheiffer, 2007 –