Van Der Merwe, Gert Johannes – Gemeentegeskiedenisargief

GEBORE

15 Nov. 1920

OORLEDE

28 Aug. 1979

UNIVERSITEIT

B.A. (Hons.)

GELEGITIMEER

1958

ORDEN

1959

STANDPLASE

1959 Victoria Wes

1961 Maclear

1964 Somerset-Wes

1976 Hottentots-Holland

EMERITEER

–

Ds. Gert Johannes (Gerjo) Van Der Merwe (15.11.1920 – 28.8.1979) se onverwagte heengaan na ŉ ongesteldheid van ŉ paar weke en ŉ breinoperasie in die Tyberberg-Hospitaal, was vir almal wat hom geken het ŉ groot skok. Vanweë sy opgewekte geaardheid, sy besielende geesdrif en sy opregte belangstelling in die wel en wee van sy gemeentelede en sy vriende, was hy alom bemind en geag. Daarby was hy vir sy Skrifgetroue en aktuele prediking bekend. Sy besondere kennis van die Afrikaanse taal is vir die hersiening en beryming van die eerste honderd Afrikaanse Gesange in die ou bundel en vir die vertaling van ŉ aantal Nederlandse tekste ingespan. Ook weens die belangrike aandeel wat hy aan die werk in verband met die nuwe Afrikaanse Psalm- en Gesangboek gehad het, sal sy naam met waardering onthou word. Om dieselfde rede het verskeie Kaapse sinodes in die versorging van hul notule van sy bekwame dienste gebruik gemaak. Verder was hy ŉ gewaardeerde medewerker aan die opstel van die Junior Kategesehandboekies (vir kleiner kinders) en met sy heengaan nog voorsitter van die SJK van Wes- en Noord-Kaapland. Hy was ook ŉ groot liefhebber van die natuur en ŉ kenner van die bonsai. Hy het uit die bekende Van der Merwe-gesin van Moerasvlei (Boplaas) in die Koue Bokkeveld in die Ceres-distrik gestam en wyle die digter-skrywer I W van der Merwe (Boerneef) was een van sy halfbroers. Nadat hy hom aan die Universiteit van Stellenbosch as onderwyser bekwaam het, is hy ŉ paar jaar in die hoedanigheid op Morgenster in Masjonaland werksaam. Later keer hy na Stellenbosch terug om in die teologie te studeer en na sy legitimasie 1958, word hy 21.2.1959 op Victoria-Wes bevestig. Daarna staan hy in Maclear (*1961); Somerset-Wes (*1964) en sedert Januarie 1977 in die gemeente Hottentots-Holland wat kort tevore van Somerset-Wes afgestig is. In die jong gemeente beywer hy hom grootliks vir die oprigting van ŉ doelmatige kerkgebou en uit die gebou vind sy begrafnis plaas ŉ week voordat dit ingewy sou word. (Jaarboek 1980/248).