Groenewald, Bernardus Hermanus – Gemeentegeskiedenisargief

Ds Bernardus Hermanus (Ben) Groenewald (26.6.1915 18.7.1976) bearbei in sy gewone bediening van ses-en-twintig jaar in die Ned Geref Sendingkerk nie minder as nege gemeentes nie: Namakwaland (1938); Willowmore-Rietbron (1940); Burgersdorp (1943); Richmond (1945); Riviersonderend (1948); Worcester (1953); Bultfontein (1957); Schweizer-Reneke (1963) en Senekal-Noord (1966); Desember 1974 word hy leraar van die gemeente Thaba ‘Nchu van die Ned Geref Kerk in Afrika, met opdrag die beheer en administrasie van die Barend van Rensburg-Kinderhuis en die Boiketlong-Ouetehuis aldaar. As buitengewoon goeie organiseerder en administrateur werk hy met groot toewyding en deeglikheid en laat hy oral diep spore na. Sy opregte nederigheid en vriendelikheid sal vir baie steeds tot besieling dien. Ook hy sterf heel skielik aan ‘n hartaanval. (Jaarboek 1977/310).